Proclamatie 2015

Vier, Stan d’r Ieësjte, Sjtadsprins va Gebrook biej de grasie va d’r Wieze Raod, Graaf uëver alle kesjtieëlule, – ulinnekes en – uulskukes, Markies uëver Groeët Gebrook va Lot- en Uëverbrook pis aa de Passart en van ‘t kesjtieël pis bienao Aostrao, Hertog uëver alle Gebreuker en Gebreukerinnekes die same mit mich en ‘t CCH, va Gebrook ‘n richtige narresjtad gónt make,

Proklamere de noe volgende elf raegels,

Ten 11e
Ich wil ‘t CCH hieël gaer filesetere….. mit hun keus vuuër dit jaor.
Mer aone flauwekul, ich waet nog welk fantasties geveul ’t waor,
biej ‘t bekinde tillefoeëntje va Ton, dees kier aa mich gerich.
En noe sjtaon ich hiej, eindelijk, en dóch mien ieësjte plich.

Ten 10e
Jos d’r driejde en zien femielje höbbe laote zieë wiej Breuker luuj vastelaovend viere
en ich haop dan aoch dat hae mich de richtige finesses van ‘t prinsevak wilt liere.
Dit jaor bringe vier oos Groeët Gebrook i vastelaovessfere,
hae mit zien greun mötsj en ich mit scepter en vere.

Ten 9e
´t Is ‘n bizonder jaor woe in oze optoch 44 jaor besjtaet.
Dat is vas en zieëker gaen klaenighaed.
Mit oos optochkomitee, de vriendenkring en de wageboewesj, groepen die d’r gans vuuër gaon;
luuj, die jieëker jaor weer vuuër oze vastelaovend vaerdig sjtaon.

Ten 8e
Vier höbben allenuij get mit dit dörp, woe v’r aoch gónge.
Get wat ós trökt, hiej bringt of hilt, mit dees plaatsj zint vier verbónge.
I de SHC pakke vier ós same, va jóngk pis gries
en klure zoe oos Breuker Paradies.

 Ten 7e
Oos fanfaar St. Gabriël is get wat va klaens aaf aa mien laeve kluurt.
Aoch va de Breuker Blaoskapel höbt gier vas waal ‘ns gehuurd.
Dees vrung kin ich al mien ganse vastelaoveslaeve.
Ich bin gruëtsj mit uch aa mien ziej en same gónt v´r alles gaeve.

 Ten 6e
De fanfaar is gehoesvest aa de Prinsesjtraot, in ‘t MFC Gebrook.
Same mit väöl anger Breuker vereniginge, hiej óm d’r hook.
De Haelesje politiek ment dit hart va g’n Ueverbrook te mótte sjlope.
Mer mit d´r mónd vol van IBA zörgt zie natuurlijk vuuër een hoeëgwaerdig alternatief, dat mage vier toch hope.

 Ten 5e
Ich woeën hoeëggelaege, mit prachtig oetzich uëver oos bóntgekluurde Narreriek.
Op ‘n histories sjtökske grónd, d’r hoofdigangk va de Staatsmijn Emma, prinselijk sjiek.
Woe vier aan ’t vreuger gesjtechel tösje Broenssem, Haelder en Gebrook wille probere,
vuuër ummer ‘n ing te maken, noe de hoesverseerders dit sjtök grónd vuuër mich en gans Gebrook gónt annexere.

 Ten 4e
D’r vastelaovend i Gebrook is toch ‘t sjoeënste wat er is.
Pis vuërig jaor ging d’r gaene daag vuuërbiej en waor d’r gaen oer wat ich höb gemis.
Ich bin bliej dat ich d’r dit jaor weer biej bin mit mien femielje en gezin.
en geweldig gruëtsj dat dat biej ‘t CCH es Sjtadsprins va Gebrook maag zin.

 Ten 3e
Nog werm biej mien Mam op d’r erm, lierde ich ‘t sjoenkelen al.
Oos sjoeënste sjtök cultuur dat gaet mich baovenal.
‘t Is noe aan Imke en mich, óm dees traditie aan oze zoeën Siem doer te gaeve.
Woebiej ich d’r aoch nao oetkiek óm mit alle vastelaoveskinger erm in erm de vastelaovend te belaeve.

 Ten 2e
Vanoet d’r sjlager is “Dóch ‘t noe” dit jaor de boodsjap vuuër jieëkeraen.
“Geneet van ‘t laeve” al gaet dat neet ummer van allaen.
Vier höbben allenuij waal ieëmes dae se d’r nog gaer biej hos gehad.
Drink aene op hun en num ze dees daag mit i dien vastelaoveshart.

 Ten 1e
Wat dich aoch uëverkumt , wat aoch gebuurt, maak sjpas woe ‘t kint,
sjtel neet oet, dóch ´t noe en maak dich bemind.
Dóch al was se daes oet ‘n good hart, da kries se gaene sjpiet,
want pas op, vuuër se ‘t wits zae se: wat vluugt d’r tied.

Gegaeven i Gebrook op 10 jannewari 2015.
Sjtadsprins Stan d’r Ieësjte, biejgesjtange doer prizedent Ton en ziene Wieze Raod van´t vastelaovesriek Gebrook.