Proclamatie 2017

Vier, Ger d’r Ieësjte, Sjtadsprins va Gebrook biej de grasie va d’r Wieze Raod, Graaf uëver alle kesjtieëlule, – ulinnekes en – uulskukes, Markies uëver Groeët Gebrook va Lot- en Uëverbrook pis aa de Passart en van ’t kesjtieël pis bienao Aostrao, Hertog uëver alle Gebreuker en Gebreukerinnekes die same mit mich en ’t CCH, va Gebrook ’n richtige narresjtad gónt make,

Proklamere de noe volgende elf raegels,

Ten 11
’t Geheim is vuërbiej, ’t zjwiege is gedao. Bedankt CCH vuuër de kans òm dit jaor vuërop te mage laope. Nao ’t tillefoontje va Ton waor ich gans ‘i de cloud’. De vuuërtaekens waore d’r al: dit jaor zelf 3×11, 11 jaor same mit Karien, dit kint neet mieë fout!

Ten 10e
Juus wiej vurrig jaor ‘ne Prins oet Mariarao, doew höbbe Tim en z’n femielje laote zieë, dat ouch dao ’t vastelaovesblood sjträömt. Same mit Tim es adjudant waert ’t vuuër mich ‘ne vastelaovend woe jieëker jòng va dräömt.

Ten 9e
Al op de bewaarsjoeël haat juf July mich gelieërd, dat d’r richtige vastelaovend i Gebrook waert gevierd. Es kloon ging ich mit ’n tròm doer de ganse sjoeël, ‘ne richtige vastelaovesgek va jòngs aaf aa. Dit geveul wil ich noe gaer doergaeve, zoedat oos jeugd d’r Breuker vastelaovend maag belaeve.

Ten 8e
Ouwer waere is neet ummer gemèkkelik. Mer vier wille helpe woe v’r kinne en d’r zin es dat nuëdig is òm zoe get trük te doeë vuuër de zörg die zie òs ummer gove.

Ten 7e
Es zoeën van Oud-Prins Ger 1 va Chalet is mich d’r vastelaovend mit d’r paplaepel i gegaeve. ’t Is mien traon tösje d’r lach vuuër de luuj die d’r dit jaor neet mieë biej kinne zin. Va jòngk pis gries zulle hun tuën blieve klinken in oos Breuker Paradies.

Ten 6e
Mit oze groep ‘Ummer te laat’ al väöl jaoren i Gebrook present en mit Kloe en anger pries dek erkend. Ich vruij mich òm dit jaor ’t werk van Optochcomité, wageboewesj, Vriendenkring en väöl andere, va baovenaaf doer de sjtraote te zieë mejandere.

Ten 5e
Nao driej jaor is ’t nuuj winkelcentrum zoe wiet en kint gier dao uch cente weer kwiet. Vergaet neet oos òngernummesj en sponsore, want zònger hun ging d’r vuuër oos vereiniginge väöl sjteun en hulp verlore.

Ten 4e
Mit Elin en Iris laote zieë, dat haof werk neet biej mich past, bin ich benuujd wiej ’t werk va de hoesverseerders mich verrast. Mit driej vrouwluuj i g’n hoes krieg ich nog gein plant verzat, dus kiek ich oet doer wae de baor i d’r gieëvel waert gezat.

Ten 3e
Mit ’n bleujende fanfaar en hermeniej i g’n dörp waert d’r kultoer good gedrage en ouch ’t leedkeskonkoer haat uëver greuj nieks te klage. Biej ’t St. Janscollege waert ‘t òngerwies i twieë talen noe gebrach, went dat Hollesj is en Breuker Plat bekiekt Ton dat mit ‘ne groeëte lach.

Ten 2e
’t Ganse jaor doer vertaal ich problemen en oplossinge nao cente, ouch d’r vastaovend is ein va die momente. Mer dekker waer ich daobiej aegewies, want sjpas en plezeer zint ònbetaalbaar en höbbe geine pries.

Ten 1e
Pak uch same en geneet van ’t laeve, dat uch i dizze vastelaovestied waert gegaeve. Gaef wermte, haop en höb begrip vuuër jòngk en gries, zoe blieft Gebrook ’n Paradies. Neet allein Gebrook, Gebrook neet allein!

Gegaeven i Gebrook, jannewari 2017. Sjtadsprins Ger d’r Ieësjte, biejgesjtange doer prizedent Ton en ziene Wieze Raod van ’t Vastelaovesriek Gebrook.